Ffen Pant-y-sais

Gellir cael mynediad i’r llwybr hwn yn uniongyrchol o’r palmant ar hyd y brif ffordd. Taith gerdded fer a hawdd yw hon, gan ddilyn y llwybr estyll trwy warchodfa natur leol gyntaf Castell-nedd Port Talbot. Hefyd yn Safle o Ddiddordeb Gwyddonol Arbennig, mae Ffen Pant-y-sais yn un o’r ffeniau gorau sy’n weddill yn ne Cymru ac mae’r mynediad hwylus iddo’n ei wneud yn lleoliad delfrydol i archwilio un o’r mannau gorau yng Nghastell-nedd Port Talbot ar gyfer bywyd gwyllt. Wedi datblygu’n naturiol ar hen gwrs afon Nedd, mae’r safle’n wlyptir cymhleth ac amrywiol sy’n cynnwys nifer o gymunedau planhigion nodweddiadol. Yn ogystal â’r planhigion, un nodwedd o’r safle yw’r amrywiaeth helaeth o greaduriaid di-asgwrn-cefn prin. O sylw penodol mae corryn rafft y ffen, sydd wedi ymaddasu i’w ddull dyfrol o fyw i’r fath raddau fel y gall symud ar draws wyneb y dŵr er gwaethaf ei faint trawiadol (mae oedolyn yn tyfu i fesur 7cm ar ei draws). Mae’r corryn i’w weld mewn 2 leoliad arall yn y DU yn unig, ac felly rhoddwyd gwarchodaeth gyfreithiol lawn iddo o dan Ddeddf Bywyd Gwyllt a Chefn Gwlad 1981. Os hoffech chi estyn eich taith gerdded, mae mynediad i lwybr halio Camlas Tennant sy’n mynd heibio i Abaty Nedd a lan tuag at Raeadr Aberdulais.