Llwybr Arfordir Cymru – Gweunydd Margam

Y rhan leiaf ei darganfod o lwybr yr arfordir yw’r rhan hon o Lwybr Arfordir Castell-nedd Port Talbot, gan ddilyn cyswllt newydd ei greu dros afon Cynffig i Ben-y-bont ar Ogwr. O’r Graig Fawr, dilynwch gyfeirbyst Llwybr Arfordir Cymru i lawr y ffordd i’r gylchfan dros yr M4, gan groesi draw i Lôn Longlands. Mae ychydig o le parcio anffurfiol yn y man hwn. Mae’r llwybr yn croesi prif reilffordd de Cymru, felly mae angen bod yn ofalus yn yr ardal hon. Mae’r llwybr yn eich arwain ar hyd rheilffordd wedi’i thynnu sy’n ymestyn o gwmpas ymyl ogleddol Gweunydd Margam, safle 100 hectar o wlyptir isel wedi’i adennill. Mae’r rhan fwyaf o’r gweunydd yn Safle o Ddiddordeb Gwyddonol Arbennig (SoDdGA) sy’n nodedig am ei gorsydd, ei laswelltir a’i ffosydd sy’n igam-ogamu trwy’r ardal, yn gartref i nifer o blanhigion a chreaduriaid di-asgwrn-cefn prin. Gerllaw mae gwaith dur amlwg Port Talbot, a agorwyd yn y 1900au cynnar ac sydd bellach yn cynhyrchu dur fel rhan o un o’r gweithfeydd mwyaf yn Ewrop. Ar ôl mynd heibio i’r gweunydd, dilynwch y llwybr trwy goetiroedd a thwyni tywod i gyrraedd afon Cynffig lle mae’r bompren yn arwain i Warchodfa Natur Genedlaethol Cynffig ac ehangder anferthol Traeth Cynffig. I ddychwelyd i’r man cychwyn, dilynwch eich camau’n ôl trwy Weunydd Margam.
Gwylio Bywyd Gwyllt: Yn y gwanwyn bydd adar mudol yn cyrraedd ac yn dechrau canu. Gwrandewch am gân ffrwydrol telor Cetti diflannol neu gallwch weld llwydfron yn canu o frig coeden; mae ei wddf yn drawiadol o wyn.